Rusia do të nisë testet finale të raketës së saj vdekjeprurëse, hipersonike, që udhëton me shpejtësi afro 10 mijë km në orë, e aftë që të fshijë qytete të tëra amerikane. Moska e quan atë ‘të pandalshme’. Arma do të testohet në det dhe në tokë duke u lëshuar nga fregata Admirali Gorshkov. Raketa Zircon, që mund të arrijë shpejtësinë e 10 mijë km në orë, është identifikuar nga media shtetërore e Moskës si arma e preferuar e Vladimir Putinit për të shkatërruar qytetet bregdetare amerikane në rast të një sulmi bërthamor. Lideri i kremlinit e ka quajtur raketët ‘të pakrahasueshme në botë” dhe rusët e konsiderojnë ‘të pandalshme’. Raketa mund të lëshohet nga një anije dhe mund të marrë në shënjestër objektiva në tokë dhe në det. Testet e fundit do të mbahen para fundit të këtij muaji. Ato pritet të zhvillohen në detin e bardhë dhe raketa pritet të hyjë më pas në shërbim vitin e ardhshëm. Raportet sugjerojnë sidoqoftë se rrezja maksimale e veprimit të saj është mes 300 deri në 1 mijë kilometra ndonëse ka edhe nga ata që thonë se rrezja e vërtetë e saj është rreth 2 mijë km. Projektimi dhe ndërtimi i raketës janë kryer në fshehtësi të madhe.