Së paku 49 persona, përfshirë 40 sulmues të armatosur, u vranë në një përleshje në jugperëndim të Nigerit, pranë kufirit me Malin. Ministria e Mbrojtjes e Nigerit tha se rreth 100 “terroristë” me motoçikleta, të armatosur rëndë, sulmuan fshatin Çoma Bangou. Ministria tha se “reagimi i shpejtë dhe i fuqishëm” i forcave të mbrojtjes dhe sigurisë “bëri të mundur që të zmbrapset sulmi dhe armikut t'i shkaktohen humbje të mëdha”. Çoma Bangou ndodhet në rajonin Tillaberi, në kufi me Malin dhe Burkina Fason, një zonë e njohur si “tre kufijtë”, e cila ka qenë rregullisht në shënjestër të grupeve radikale islamike. Tillaberi është në gjendje të jashtëzakonshme që prej vitit 2017. Një nga vendet më të varfra në botë, Nigeri ka luftuar për vite me celulat xhihadiste në kufirin e saj jugperëndimor me Malin, si dhe grupimin Boko Haram në kufirin e saj juglindor me Nigerinë. Sulmet e përsëritura kanë marrë qindra jetë dhe kanë detyruar mijëra njerëz të largohen nga shtëpitë e tyre. Në janar, 70 civilë u vranë nga persona të armatosur në Çoma Bangou dhe 30 të tjerë në fshatin fqinj Zarumadareye.