Kryeministri holandez, Mark Rutte, pranoi të hënën se kufizimet për koronavirusin, u zbutën më shpejt nga sa duhej, dhe për këtë, kërkoi falje. Numri i të infektuarve në Holandë është rritur në nivelet më të larta këtë vit. Të premten e javës së kaluar, Rutte ktheu kufizime në bare, restorante dhe klubet e natës, në përpjekje që të ndalë zinxhirin e infektimeve te të rinjtë, vetëm dy javë pasi shumica e masave të izolimit u hoqën në vend. “Ajo që ne mendonim se ishte e mundur, doli në praktikë, e gabuar”, tha Rutte të hënën. “Nuk kemi pasur gjykim të drejtë, na vjen keq dhe kërkojmë falje”. Ndjesa e tij përbën një kthesë 180 gradëshe pasi më herët ai kishte mbrojtur me zjarr lehtësimin e masave dhe kishte refuzuar të merrte fajin për keqmenaxhimin e mundshëm të situatës nga Qeveria e tij. Ky qëndrim kishte nxitur kritika nga autoritetet shëndetësore, të cilat thanë se Qeveria kishte inkurajuar të rinjtë që të dalin sërish. Deri më tani, rritja e numrit të të infektuarve në Holandë nuk ka ndikuar në rritje të numrit të pacientëve nëpër spitale, duke marrë parasysh se shumica e rasteve të reja janë mes të rinjve. Megjithatë, ministri holandez i Shëndetësisë, Hugo de Jonge, ka thënë të premten se numri i personave të shtrirë nëpër spitale, mund të “rrezikohet” nga një rritje e pashembullt e shkallës së infektimit.