Zyrtarët gjermanë thanë të martën se masat për luftim të koronavirusit duhet të mbeten në fuqi derisa të imunuzohet pjesa më e madhe e popullsisë, ndërsa planin e Britanisë së Madhe për heqjen e shumicës së kufizimeve, ndonëse po përhapet varianti Delta, njëri prej tyre e ka konsideruar “eksperiment tejet të rrezikshëm”. Nga 19 korriku, Britania e Madhe do të pezullojë vendimet për vendosje të maskës dhe mbajtje të distancës fizike. Ministri gjerman i Ekonomisë, Peter Altmaier, ka thënë se kufizimet për koronavirus janë ende të nevojshme për të shmagur një tjetër izolim të ekonomisë. “Secili duhet të jetë i këshilluar që të marrë të gjitha masat e nevojshme të sigurisë”, ka thënë Altmaier, duke shtuar se është i shqetësuar për heqjen e detyrimit të maskës dhe mbajtjes së distancës fizike. Gjermania ka raportuar të martën 646 raste të reja me koronavirus, nga 440 të një jave më parë. Vendimi i Francës për vaksinim të detyrueshëm të të gjithë stafit shëndetësor, ka zgjuar debate në Gjermani, nëse njerëz të disa profesioneve duhet të detyrohen që të marrin vaksinën. Alena Buyx, udhëheqëse e këshillit gjerman të etikë, tha se vaksinimet e detyrueshme nuk janë të nevojshme në Gjermani. “Në krahasim me Francën, ne kemi shkallë më të lartë vaksinimi të stafit shëndetësor. Besoj se nuk kemi nevojë për dicka të tillë”, tha ajo.