Një 19-vjeçar shqiptar ka rënë në prangat e policisë në Angli, pasi u kap në një “shtëpi bari”, duke u kujdesur për 213 bimë narkotike. Droga ishte e mbjellë në gjashtë dhoma në një shtëpi të madhe me katër kate, në Bradford. Pasi e kishte monitoruar për disa muaj Drilon Zelajn, forcat e policisë shkuan dhe trokitën në derën e godinës ku ndodhej i riu për të kryer kontrollet. Fillimisht Zelaj nuk ua hapi derën policëve, edhe pse ata arrinin të dëgjonin lëvizjet e 19-vjeçarit brenda godinës. Por më pas policët u futën nga dera e prapme, duke bërë arrestimin e të riut shqiptar. Para gjykatës ai mohoi përfshirjen e tij në kultivimin e kanabisit, por kur gjurmët e gishtave dolën në çdo cep, që nga baza e prodhimit të lëndëve narkotike, ai pranoi akuzën. Zelaj në fillim tha se u detyrua të kujdesej për bimët pasi u kërcënua nga njerëz që nuk i njihte. Ai nuk e ngriti vetë “fermën”, por roli i tij ishte thjesht të ujiste bimët dhe të ndizte e të fikte dritat. Drilon Zelaj tha se kishte ardhur në Angli për një jetë më të mirë dhe për të ndihmuar familjen e varfër në Shqipëri. 19-vjeçari më parë kishte punuar në lavazh dhe kishte mbërritur në Angli përmes Francës.