Maqedonia e Veriut nisi vaksinimin e gazetarëve dhe punonjësve të tjerë të mediave, të cilët ashtu si edhe grupe të tjera të rrezikuara nga Covid 19 në vendin e tyre të punës, janë imunizuar me vaksinën ruse Sputnik V. 631 persona janë paraqitur sipas Shoqatës maqedonase të gazetarëve për t`u vaksinuar. Të gjithë ata pëermbushnin kushtet e përcaktuara nga Ministria e Shëndetësisë, ku përfshiheshin sëmundjet e tjera shoqëruese dhe mosha mbi 40 vjec. Ndërkohë, vaksina e AstraZenecas, po u administrohet personave të moshës mbi 60 vjec. “Personat që aplikuan për thirrjen e parë, dhe që nuk i plotësuan kërkesat për këtë fazë të vaksinimit, si dhe të gjithë gazetarët dhe punonjësit e tjerë të medias të interesuar, do të imunizohen për grupin tjetër të vaksinimit që pritet të bëhet së shpejti. E njëjta gjë vlen për të gjithë ata që aplikuan pas skadimit të afatit të aplikimit në këtë fazë të vaksinimit”, thuhet në njoftimin me shkrim të Shoqatës së Gazëtarëve. Deri të hënën në Maqedoninë e Veriut janë vaksinuar mbi 24 mijë persona, ndërsa në aplikacionin “vaksinimi” figurojnë emrat e mbi 140 mijë vetëve. Autoritetet shëndetësore njoftuan sakaq uljen e numrit të pacientëve me COVID-19 të shtruar në spitale, si dhe atë të rasteve të reja.