Byroja e Kundërterrorizmit e Departamentit të Shtetit të SHBA-së ka shprehur mirënjohje për Kosovën, pas vendimit të Qeverisë që e klasifikoi si organizatë terroriste Gardën Revolucionare Islamike të Iranit. “E falënderojmë Kosovën që qëndron kundër terrorizmit dhe për përcaktimin e IRGC-së si organizatë terroriste”, thuhet në reagimin e Byros në rrjetin social X. Deklarata vjen disa ditë pasi ministri i Punëve të Jashtme, Glauk Konjufca, njoftoi vendimin në të njëjtën platformë, duke theksuar se Kosova qëndron në linjë me aleatët ndërkombëtarë. “Republika e Kosovës e ka shpallur IRGC-në si organizatë terroriste. Një vendim i qartë, i bazuar në parim: ne qëndrojmë me aleatët tanë, me sigurinë demokratike dhe kundër terrorit në të gjitha format e tij”. Para Kosovës, një vendim të ngjashëm shpalli edhe qeveria shqiptare.