Gjykata Themelore e Prishtinës dënoi me burgim të përjetshëm dy serbë të akuzuar për pjesëmarrje në sulmin terrorist të Banjskës më 24 shtator 2023, teksa një i tretë u dënua me 30 vite burgim. Me burgim të përjetshëm u dënuan shtetasit Blagoje Spasojeviç dhe Vladimir Toliç, ndërsa 30 vite burgim u shqiptuan ndaj Dushan Maksimoviç. Për këtë sulm, kur ra dëshmor rreshteri Afrim Bunjaku, autoritetet e Kosovës kanë identifikuar 45 persona, ku në rolin e organizatorit akuzohet Milan Radoiçiç. Pas dështimit të përpjekjes për të shkaktuar trazira në veri të Kosovës, Radoiçiç dhe pjesa më e madhe e anëtarëve të tjerë të grupit u arratisen drejt Serbisë, ku dyshohet se strehohen edhe sot nën mbrojtjen e institcioneve të Beogradit. Ndërkohë, tre të dënuarit nga gjykata e Prishtinës ishin pjesë e grupit të personave që u arrestuan nga policia e Kosovës pas sulmit terrorist. Disa prej tyre u liruan menjëherë pasi u provua se nuk ishin pjesë e grupit, ndërsa për Spasojeviç, Toliç dhe Maksimoviç, prokuroria provoi rolin aktiv në këtë sulm.