Periudha e qetësisë në marrëdhëniet mes Greqisë dhe Turqisë duket se ka marrë fund. Pas afrimit mes dy vendeve pas tërmetit shkatërrues që goditi Turqinë në shkurt të vitit 2023 dhe nënshkrimit të Deklaratës së Athinës në dhjetor të po atij viti, tensionet e vjetra në Detin Egje po rikthehen në qendër të marrëdhënieve dypalëshe. Shkaku i përplasjes së re është shpallja nga Turqia, më 15 gusht, e dy zonave të mbrojtura detare në Detin Egje dhe Mesdheun Lindor. Njëra prej tyre shtrihet në zonën detare mes ishujve grekë Limnos dhe Samothraki, ndërsa tjetra ndodhet në lindje të Rodosit. Athina reagoi menjëherë, duke e cilësuar këtë veprim si të paligjshëm. Ministria e Jashtme greke deklaroi se shpallja e zonave të mbrojtura në hapësira që ndodhen jashtë ujërave territoriale turke nuk prodhon asnjë efekt juridik. Edhe kryeministri grek ka theksuar se Greqia dëshiron marrëdhënie të mira me fqinjët, por ka bërë të qartë se Athina është e gatshme të mbrojë zonat që konsideron nën sovranitetin e saj. Në thelb të përplasjes qëndron mosmarrëveshja shumëvjeçare mes dy vendeve për kufijtë detarë në Egje dhe Mesdheun Lindor. Greqia dhe Turqia kanë pretendime të kundërta për zonat ekonomike ekskluzive, të drejtat e peshkimit dhe shfrytëzimin e burimeve natyrore. Megjithëse, në sajë të faktit që disa zona te reja janë shpallur si “parqe detare”, Athina ka shprehur hapur dyshimin se pas kësaj nisme fshihet një strategji më e gjerë e Ankarasë për të forcuar pretendimet e saj në hapësirat e kontestuara. Në Greqi ekziston shqetësimi se kjo lidhet me doktrinën turke “Mavi Vatan”, ose “Atdheu Blu”, përmes së cilës Turqia kërkon një rol dhe kontroll më të madh në zona të Detit Egje dhe Mesdheut Lindor. Ankaraja vë në diskutim kufijtë detarë dhe të drejtat që Greqia dhe Qiproja pretendojnë mbi zonat e tyre ekonomike.