Kryeministri grek Kyriakos Mitsotakis shpalli të shtunën një paketë të re masash ekonomike, me vlerë rreth 1.8–2 miliardë euro, që synon tu vijë në ndihmë pensionistëve, punonjësve, fermerëve, familjeve dhe bizneseve. Pensionistët mbi 65 vjeç, personat me aftësi të kufizuara dhe të moshuarit e pasiguruar do të përfitojnë nga nëntori një ndihmë vjetore prej 400 eurosh. Ndërkohë, qiramarrësit do të marrin rimbursimin e vlerës së një qiraje mujore për vitin 2025. Paga minimale në sektorin privat do të rritet gradualisht nga 950 euro në 1,000 euro bruto, ndërsa punonjësit e administratës publike do të përfitojnë rritje pagash dhe, për herë të parë pas më shumë se një dekade, një bonus Krishtlindjesh prej 500 eurosh bruto. Lehtësime të reja parashikohen edhe për fermerët dhe familjet me fëmijë. Fermerët me të ardhura deri në 20 mijë euro në vit dhe familjet me tre fëmijë do të kenë përjashtime tatimore. Për strehimin, qeveria do të nisë programin “Shtëpia ime 3”, me fond prej 2 miliardë eurosh. Mitsotakis e cilësoi paketën si pjesë të “dividendit të rritjes” së ekonomisë greke, në një kohë kur kostoja e jetesës mbetet një nga shqetësimet kryesore të qytetarëve.