Policia ka vënë në pranga drejtuesin 22 vjeçar të automjetit tip “Audi”, i cili shkaktoi humbjen e menjëhershme të jetës së katër pjesëtarëve të familjes Gushi në aksin rrugor Fier-Vlorë. Shpejtësia mbi çdo normë të lejuar e “Audit” luksoz të Igli Madanit, bëri që ky i fundit të humbte kontrollin e automjetit duke u përplasur me makinën tip “Toyota” të familjes Gushi, e cila sapo ishte kthyer për pushime nga Greqia. Pushimet u kthyen në tragjedi për prindërit dhe dy fëmijët e mitur të familjes Gushi, të cilët humbën jetën në mënyrë të menjëhershme në vendngjarje. Igli Madani, sipas ligjit rrezikon të dënohet nga 5 deri në 20 vite burg. Sipas Kodit Rrugor të Shqipërisë, në nenin 290 të tij, thuhet se kur nga shkelja e qarkullimit rrugor është shkaktuar vdekja ose plagosja e rëndë e disa personave, dënohet me burgim nga pesë deri në njëzet vjet. Lajmi i trishtë mëngjesin e kësaj të premteje, tronditi mbarë opinionin publik dhe i ktheu dhe njëherë sytë e policisë së shtetit dhe figurave publike tek rritja e masave dhe burimeve njerëzore për të garantuar sigurinë e shoferave në akset rrugore.