Zyrtarë dhe ish-zyrtarë janë kallëzuar penalisht nga Kontrolli i Lartë i Shtetit, pas verifikimit të një sërë dokumentesh, ku rezultoi se me veprimet dhe mosveprimet e tyre kanë ndikuar në kryerjen e veprimeve abuzime, duke mashtruar me pronat publike dhe financat e shtetit. Një prej detyrimeve ligjore për Kontrollin e Lartë të Shtetit është edhe auditimi i institucioneve shtetërore që operojnë me fondet e qeverisë. Për këtë në kuadër të angazhimit për të luftuar pa kompromis veprimet abuzive dhe ato të mashtrimit financiar me pronën publike, me synim përmirësimin e qeverisjes publike, Kontrolli i Lartë iShtetit gjatë ushtrimit të punës audituese ka konstatuar shkelje të cilat përbëjnë vepër penale. Pas hetimit financiar në Drejtorinë Vendore të Agjencisë Shtetërore të Kadastrës dhe në Bashkinë Sarandë, rezulton se nga Bashkia Sarandë janë shitur dhe kaluar troje e prona në pronësi të personave privatë. Rezultatet e këtij auditimi kanë evidentuar problematikat e menaxhimit të aseteve dhe pasurisë publike, si dhe përgjegjësitë përkatëse nga tre ish-zyrtarët, veprimtaria e të cilëve ka rezultuar me mospërputhje dhe devijime ligjore, si pasojë e regjistrimeve të pronave të kryera në mungesë të titujve të pronësisë, të cila kanë sjellë pasojën e përfitimit për persona të tjerë duke dëmtuar interesat e ligjshme të shtetit. Përbec këtij rasti, inspektorët e Kontrollit të Lartë të Shtetit evidentuan shkelje edhe nga katër funksionarë të Drejtorisë së Rrugëve në Rajonin Verior të Shkodrës, për të cilët ka rezultuar se kanë kryer veprime të kundraligjshme gjatë ushtrimit të detyrës. Në përfundim të procesit të auditimit janë konstatuar një sërë shkeljesh mbi zbatimin e ligjshmërisë në prokurimin e fondeve publike dhe sipërmarrjet e mirëmbajtjes së segmenteve rrugore në juridiksionin që mbulon Drejtoria e Rrugëve e Rajonit Verior Shkodër. Për të dy këto raste, Kontrolli i lartë i Shtetit i është drejtuar Prokurorisë ku kërkon ndjekje për veprën penale të “shpërdorimit të detyrës” parashikuar në nenin 248 të Kodit Penal.