Kryetari i Lidhjes Demokratike të Kosovës, Lumir Abdixhiku, i është përgjigjur ofertës së kryeministrit të Kosovës, Albin Kurti, për hedhjen në tryezë të 3 emrave për t’i propozuar për presidentin e ardhshëm të vendit. Në një konferencë për media pas seancës së jashtëzakonshme të Kuvendit të Kosovës, Abdixhiku tha se po shqyrton opsionet, ndërsa theksoi se Vjosa Osmani mund të jetë një ndër emrat e propozuar Megjithatë, ai nuk i ka fshehur dyshimet mbi këtë lëvizje të Kurtit, duke theksuar se mund të jetë vetëm një lojë politike dhe jo tentativë për të gjetur një zgjidhje. Nga ana tjetër, partitë e tjera opozitare janë shprehur të bindura se oferta e Kurtit është një tallje e manovër politike, ndaj dhe kanë refuzuar në mënyrë kategorike t’i bashkohen thirrjes së tij. Pas mbledhjes së Kryesisë, kreu i Vetëvendosjes njoftoi se kërkon që opozita të paraqesë 3 alternativa për presidentin e ardhshëm, duke theksuar se emrat e propozuar duhet të jenë jashtë skenës aktuale të politikës, ndërsa shtoi se afati përfundon të dielën në mbrëmje. Ndërkohë, nëse VV dhe Lidhja Demokratike e Kosovës gjejnë gjuhën e përbashkët, bashkimi i kartonëve jeshilë të të dyja palëve, do të zgjidhte me sukses ngërçin e krijuar, duke çuar në zgjedhjen e presidentit të ri.