Ankesat ndaj gjyqtarëve dhe prokurorëve pranë ILD-së u rritën ndjeshëm gjatë vitit që lamë pas, kryesisht për shkak të pretendimeve për vendimmarrje të padrejta të magjistratëve gjatë shqyrtimit të çështjeve, zvarritje të gjykimit apo edhe shkelje procedurale. Ankuesit në total ngritën pretendime ndaj 1684 subjekteve të hetimit disiplinor, 67 për qind e të cilëve ishin gjyqtarë. Pretendimet ndaj magjistratëve të Gjykatës së Rrethit Gjyqësor Tiranë kanë numrin më të lartë të ankesave në raport me gjykatat e tjera të shkallës së parë por edhe të gjykatave të niveleve të tjera, me 218 ankesa.