Një pjesë e konsiderueshme e qytetarësh shqiptarë deklarojnë se nuk kanë mundësi që të blejnë apo të ndërtojnë një shtëpi, cka është në kontrast me lulëzimin që po përjeton tregu i pasurive të paluajtshme kohët e fundit. Banka e Shqipërisë në indeksin që harton për treguesin e besimit të bizneseve dhe konsumatorëve, një prej pyetjeve e ka lidhur me blerjen e shtëpive. Të anketuarve, në bazë tremujore, u bëhet pyetja: “A keni në plan të blini ose të ndërtoni një shtëpi gjatë 12 muajve të ardhshëm? dhe mundësitë e zgjedhjes janë : Po, me siguri; E mundshme; Ka shumë mundësi që jo; Jo; Nuk e di. Dhe përgjigjet kanë treguar një pamundësi të lartë për blerjen e një shtëpie. Në pyetësorin e Bankës së shqipërisë, pamundësia për të blerë shtëpi është më e larta dhe shifra është përkeqësuar edhe për shkak të pasigurisë së krijuar nga pandemia dhe rritja e papunësisë. Dhe kjo ndodh në një kohë kur sektori i pasurive të paluajtshme duket se nuk e ka ndjerë krizën. Por, përvec shtëpisë, shqiptarët nuk munden as të blejnë një makinë, dhe kjo ka rezultuar qartë nga pyetësori. Sipas Eurostat, Shqipëria është një nga vendet me numrin më të ulët të automjeteve në raport me popullsinë, së bashku me Maqedoninë.