Njësia administrative nr 2 në Tiranë, ka dërguar në prokurori një punonjës që duhej të ruante objektin por që kishte kopjuar celësat dhe pas orarit zyrtar hyntë në godinë dhe vuloste dokumenta. Ngjarja u zbulua rastësisht nga punonjësit e kësaj njësie që kanë konstatuar përmes kamerave të sigurisë se punonjësi i dyshuar, Artan Cikollari, nuk qëndronte në vendin e tij të punës, por mbas përfundimit të orarit zyrtar sapo stafi largohej dhe zyrat mbylleshin, merrte vulën dhe plotësonte certifikata familjare. I arrestuar nga policia mbas denoncimit të dy punonjësve, roja përfundoi para gjykatës për dyshimet e shpërdorimit të detyrës dhe falsifikimit të dokumentave. Prokuroria thotë se çelësat e përdorur janë çelësa të kopjuar. 53 vjecari shfaqet në kamera teksa hap kangjellat metalike me çelës, hyn brenda në zyrat e gjendjes civile dhe përdor vulën dhe firmos dokumenta. I pyetur nga prokurori, i dyshuari ka pranuar ngjarjen me justifikimin se një fëmije që do udhëtonte për ekskursion në Kosovë, i duhej urgjent certifikata dhe ai e shkeli detyrën për ta ndihmuar. Por, prokuroria konsideroi gjatë masës së sigurisë se një veprim i tillë është shkelje e detyrës.