Tymi dhe nxehtësia që lëshojnë zjarret e dala jashtë kontrollit në oregonin juglindor, po krijojnë re gjigande zjarri, kolona të rrezikshme tymi dhe hiri që mund të arrijnë deri në 10 km lartësi në qiell dhe janë të dukshme nga më shumë se 160 km largësi. Autoritetet i kanë vendosur këto re në krye të listës për sjelljen ekstreme të zjarreve që ata po e shohin në vatrën që njihet me emrin Bootleg, më e madhja aktive në SHBA. Ferri i flakëve u rrit akoma më shumë të premten, duke përfshirë një sipërfaqe prej 976 km katror, një zonë kjo më e madhe se qyteti i Nju Jorkut, dhe po vazhdon të përhapet në një pjesë të perëndimit amerikan që po përjeton thatësira historike. Meteorologët këta javë konfirmuan një formë më të madhe dhe më ekstreme të resë së zjarrit, që është në gjendje të krijojë sistemin e saj të motit duke shkaktuar edhe tornado zjarresh. Sjellja ekstreme e zjarrit, përfshirë krijimin e më shumë reve të zjarrit, pritet të vazhdojë edhe në vijim e madje edhe të përkeqësohet gjatë fundjavës. Aktualisht ka të paktën 70 vatra zjarri që vazhdojnë të digjen në shtetet e bashkuara dhe dhjetëra të tjera në Kanada.