Një shtetas italian 72-vjeçar është arrestuar në New Jersey nga agjentët e Shërbimit të Imigracionit dhe Doganave në SHBA (ICE), nën dyshimin për mashtrim zgjedhor dhe votim të paligjshëm në zgjedhjet federale amerikane. Sipas një njoftimi të publikuar nga ICE në rrjetin social X, i arrestuari është identifikuar si Andrea Morzetta. Ai dyshohet se ka marrë pjesë në katër procese zgjedhore federale, ndonëse nuk kishte të drejtë vote, pasi nuk është shtetas amerikan. Në reagimin e saj, ICE theksoi se votimi i qëllimshëm nga persona që nuk plotësojnë kriteret ligjore nuk përbën thjesht një shkelje administrative, por mund të përbëjë vepër penale. Agjencia deklaroi gjithashtu se administrata Trump synon të forcojë kontrollet për mbrojtjen e integritetit të zgjedhjeve në Shtetet e Bashkuara. Arrestimi u krye në New Jersey, shtet që zbaton politika të njohura si “strehë”, të cilat kufizojnë bashkëpunimin e autoriteteve lokale me agjencitë federale në çështjet e zbatimit të ligjeve të emigracionit. Ndërkohë, ky nuk është rasti i vetëm i raportuar së fundmi nga autoritetet amerikane. Një shtetas finlandez është arrestuar gjithashtu nga zyra e Filadelfias e Hetimeve të Sigurisë Kombëtare (HSI), strukturë që funksionon në kuadër të ICE-së. Sipas autoriteteve, ai dyshohet se ishte regjistruar për të votuar me synimin për të marrë pjesë në zgjedhjet e përgjithshme të vitit 2024. Hetimet për të dy rastet lidhen me dyshimet për shkelje të ligjeve federale amerikane që rregullojnë të drejtën e votës për shtetasit e huaj.