Raporti vjetor i antidrogës italiane 2024, që i referohet të dhënave të vitit 2023, konstaton një rol në rritje të organizatave kriminale shqiptare që veprojnë në Itali. Sipas raportit, që u publikua të martën nga Drejtoria e Antidrogës italiane, "trafikantët shqiptarë të drogës po ngjiten me shpejtësi në radhët e organizatave më agresive dhe më të fuqishme të trafikut të drogës në Itali”. Sipas raportit, shtetasit shqiptarë renditen në vitin 2023 pas marokenëve në raportimet e policisë italiane pranë organeve të drejtësisë për veprat penale të drogës, me 171 organizata. Pjesa më e madhe e shqiptarëve të raportuar, sipas policisë italiane, kanë aktivite në fushën e kokainës dhe kanë aftësi për të lëvizur sasi të mëdha të kokainës dhe heroinës. “Për kokainën", thotë raporti, "ata kujdesen për çdo fazë të zinxhirit të furnizimit dhe shpërndarjes: blerjen në vendet e prodhimit, grumbullimin në portet holandeze dhe belge, transportin në destinacion me mjete të modifikuara, deri në fazën e shpërndarjes së drogës në territorin Italian”. Sipas raportit, kartelet meksikane, ato braziliane dhe mafia shqiptare duket se janë partnerët kryesorë të rrjeteve kolumbiane.