Kuvendi kombëtar i Partisë demokratike ka pasur disa prapaskena të cilat shprehin qartësisht ndasitë dhe përçarjet që vijojnë të shtrohet këmbë kryq në tryezat e demokratëve. Në mbledhje e organit më të lartë partiak, gjatë të cilës vuloset statuti i ri i Partisë Demokratike si dhe votohet për emrat e listës së këshillit kombëtar, u vu re karrigia bosh e ish presidentit, njëherazi kryetari i këshillit kombëtar, Bujar Nishani. Në Pallatin e kongreseve nuk munguan edhe rivalët e Bashës në garën për kryesimin e Partisë Demokratike. Menjëherë pas fjalës së kryedemokratit Basha, fjalën e morën 19 drejtuesit politikë. Megjithatë Agron Shehaj ka refuzuar të ngjitet në foltoren e kuvendit kombëtar. Ndërkohë Fatbardh Kadilli u shfaq ulur me Jemin Gjanën. Në fokus ka qenë edhe takimi i kreut të Partisë Demokratike, Lulzim Basha me ish kryeministrin e shpallur non grata nga sekretari i departamentit të shtetit amerikan, Antony Blinken. Ish kryeministri dhe Basha kanë pasur një takim shumë miqësor me njëri tjetrin, duke shtrënguar duart e duke u ulur pranë njëri tjetrit në karriget e Pallatit të kongreseve. Në fjalimin e tij, Basha bëri një deklaratë lidhur me deputetët e përfshirë në afera kriminale apo korruptive.