Një 32-vjeçar shqiptar është arrestuar në ishullin Mykonos të Greqisë, ndërkohë që po kërkohën 3 bashkëpunëtorë të tij, nga të cilët njëri është identifikuar. Ata akuzohen se kishin krijuar një grup që kryente vjedhje në akomodime turistike. Nga hetimet janë zbardhur shtatë raste të vjedhjes së parave dhe sendeve, vlera e të cilave llogaritet në mbi 55 mijë euro. Mes viktimave të vjedhjeve është edhe një shqiptare. Gjatë operacionit u identifikua një zonë e hapur ku banonin përkohësisht në një çadër dhe kishin fshehur sendet e tyre mes shkëmbinjve. Efektivët e policisë kanë pikasur të dyshuarit duke lëvizur pranë vendqëndrimit të tyre, të cilët duke parë kontrollin e afërt janë larguar me vrap. Megjithatë, më pas gjatë kontrolleve, u arrit të arrestohej Aldo Leshi, i cili u kap teksa tentoi të arratisej. Si bashkëpunëtor i tij është identifikuar dhe shpallur në kërkim Ariol Nikolli, ndërsa po punohet për identifikimin dhe kapjen e dy bashkëpunëtorëve të tjerë që dyshohet se janë shqiptarë.