Kosova do të shkojë në zgjedhjet e katërta në harkun kohor të 15 muajve. Partitë politike në Kuvend dështuan që të tejkalojnë ndasitë dhe të zgjedhin një emër për Presidentin e ri të vendit. Afati kushtetues i mesnatës mes të martës dhe të mërkurës u përmbyll pa sukses. Pas këtij zhvillimi, sipas vendimeve të Gjykatës Kushtetuese në Kosovë ka nisur numërimi i afatit për mbajtjen e zgjedhjeve të parakohshme. Këto të fundit duhet të mbahen brenda 45 ditëve, teksa Kuvendi është shpërndarë automatikisht dhe Albin Kurti u rikthye edhe njëherë tjetër si kryeministër i një qeverie në detyrë me kompetenca të kufizuara ligjërisht. Këto janë zgjedhjet e katërta në total, të tretat parlamentare që mbahen në Kosovë prej datës 9 shkurt të vitit të kaluar. 15 muaj më parë, Vetëvendosje doli parti e parë, por nuk siguroi dot e vetme dhe as me aleatët e saj të vegjël 61 mandatet e nevojshme për të qeverisur vendin, teksa ngërçi u rrotullua rreth konstituimit të Kuvendit.