9 orë diskutime nuk mjaftuan që trupa e anëtarëve të Gjykatës Kushtetuese të dilte me një vendim të formës së prerë për kushtetuetshmërinë e zgjedhjeve të 30 Qershorit 2019, vendim, që duhet të merret pas një padie për paligjshmëri të Shoqatës së Bashkive. Thuajse në të njëjtim mendim, 7 anëtarët e Kushtetueses kërkuan një opinion nga Venecia, duke e parë zgjidhjen vetëm prej atij komisioni dhe jo brenda vetes. Në seancën e gjatë të së mërkurës palët folën gjatë dhe më shumë kohë mori edhe ç’dekretimi i 30 Qershorit nga presidenti Ilir Meta, megjithëse pikërisht për këtë episod, që solli edhe nisjen e përplasjes mes qeverisë dhe presidencës, Komisioni Venecias e ka dhënë opinionin e vet në Tetor 2019. Në opinionin për “Kompetencën e presidentit për të caktuar datën e zgjedhjeve” kërkuar nga Kuvendi Shqipërisë, Komisioni i Venecias mbërriti se Presidenti mund t’i anulojë zgjedhjet për organet e qeverisjes vendore në një situatë që përmbush kriteret për marrjen e masave të jashtëzakonshme. Edhe në një rast të tillë, Presidenti ka nevojë për një bazë ligjore të posaçme – ad hoc – për të shtyrë zgjedhjet. Anulimi i zgjedhjeve është i mundur vetëm në situata që përmbushin kërkesat për deklarimin e një gjendjeje të jashtëzakonshme. Megjithatë rregullat kushtetuese të zbatueshme për situatat e jashtëzakonshme në këtë rast nuk janë ndjekur. Nuk pati gjithashtu as konsensus politik, që do të kish bërë të mundur krijimin e një baze ligjore Ad Hoc.” Ndërsa për bojkotin e atyre zgjedhjeve nga forcat opozitare mbërriti në përfundimin se nuk mund të pengojë mbajtjen e zgjedhjeve të rregullta. Ndryshe, këto parti do të kishin mjetin e pengimit të çdo zgjedhjeje.