Prej disa ditësh disa nga shtetet e Evropës, janë përfshirë nga rreshjet e shumta të shiut, të cilat kanë shkaktuar jo vetëm dëme materiale, por kanë marrë edhe jetë njerëzish. Kjo të paktën po ndodh në shtetet si Gjermania, Holanda dhe Belgjika. Në Gjermani situata paraqitet shumë alarmante ku çdo orë që kalon numri I viktimave dhe I personave të zhdukur pëson rritje. Lidhur me gjendjen alarmante që paraqitet në vendet e BE, Instituti i Gjeoshkencave të Energjisë, Ujit dhe Mjedisit ka njoftuar se gjatë 5 ditëve të ardhshme në Shqipëri parashikohet një mot me reshje lokale që mund të jenë me vërshime uji të shkurtra dhe shkarkesa elektrike kryesisht në zonat malore. Mirëpo, pavarësisht motit katastrofik që ka pushtuar një pjesë të Europës, IGJEUM thekson se situata që pritet në vendin tonë është normale për tipin e reshjeve me shtrëngata në stinën e nxehtë. Nga ana tjetër, ministria e Mbrojtjes ka sqaruar se janë aktivizuar në gjendjen e gatishmërisë të gjitha strukturat dhe kapacitetet e emergjencave civile, në nivel qendror dhe vendor për zbatimin e planeve në rastet e përmbytjeve.