Qytetet dhe fshatrat e shkatërruar nga eventi i motit ekstrem i javës së shkuar, në gjermaninë perëndimore druajnë se do të mbeten pa akses në energji elektrike dhe ujë të pijshëm për muaj të tërë ndërsa vendi nis të debatojë nëse një sistem më efikas i paralajmërimit të hershëm do të kish mundur të shpëtonte jetën e 163 personave që kanë humbur jetën në përmbytje. Në rajonin Ahrëeiler, në rrëzë të maleve Eifel, rreth 30 mijë vetë janë aktualisht pa energji elektrike, pa ujë të pijshëm dhe pa gaz, pas përmbytjeve katastrofike që pasuan reshjet rekord të shiut, që shkatërruan zonën të mërkurën e kaluar, duke rrënuar sistemet e kanalizimeve, duke dëmtuar gazsjellësit dhe duke ndaluar punën edhe në një impiant pastrimi të ujit. Duket se infrastruktura është aq e shkatërruar sa që disa vende nuk do të mund të kenë ujë të pijshëm për javë apo muaj”, tha kryebashkiaku i Alternahr-it. Ndërkohë mediat gjermane po pyesin përse paralajmërimet e lëshuara nga sistemi evropian i njoftimit për përmbytje, katër ditë para fillimit të reshjeve, nuk coi në evakuime të hershme në rajonet që parashikohej se do të prekeshin më rëndë. Zyrtarët kanë pranbuar se sistemi i hershëm i paralajmërimit nuk ka funksionuar por thonë se nuk ka probleme thelbësore me sistemin.