Pas shtatë sulmeve ndaj anijeve tregtare pranë Rumanisë dhe Bullgarisë, vende anëtare të NATO-s, gjatë muajit të kaluar, aleanca ushtarake e udhëhequr nga SHBA-ja njoftoi se do të dislokojë avionë patrullimi detar, radarë dhe dronë për të forcuar krahun e saj lindor në Detin e Zi. Tri ditë më vonë, më 23 tetor, një tjetër anije u godit pikërisht jashtë ujërave rumune. Ndërsa javën e kaluar, një anije greke për transportin e kontejnerëve u fundos nga dronë detarë brenda zonës ekskluzive ekonomike të Bullgarisë. Sulmet e pandërprera tregojnë se si përshkallëzimi i luftës detare mes Rusisë dhe Ukrainës po shndërrohet në një sfidë madhore për NATO-n në Detin e Zi, duke i lënë të ekspozuara shtetet anëtare që kufizohen me këtë det, si Rumania dhe Bullgaria. Analistët ushtarakë shprehen se nuk kanë pothuajse asnjë dyshim që këto janë sulme ruse. Sipas kompanisë së sigurisë detare "Ambrey", një dron detar që shfaqet në pamjet e sulmit të fundit ngjan me një model rus. Rusia mohon se ka vënë në shënjestër fqinjët e Ukrainës me dronë dhe pretendon se janë qeveritë evropiane ato që po e përshkallëzojnë luftën në Ukrainë përmes dërgimit të ndihmës ushtarake.