Dallgët e para të cunamit u përplasën mbi Kuji, Mijako dhe Urakava, deri në 80 centimetra të larta, por autoritetet paralajmëruan se dallgë më të mëdha mund të pasonin. Dallgët më të mëdha parashikohej të godisnin prefekturat Iëate dhe Aomori në majë të ishullit kryesor Honshu të Japonisë, si dhe ishullin verior të Hokkaido-s, thanë autoritetet. Ato shtuan se qeveria po përpiqet të konfirmojë nëse ka pasur viktima. Mijëra njerëz u njoftuan të evakuohen ndërsa banorët janë paralajmëruar të qëndrojnë larg bregdetit. Cunami vjen pas një tërmeti me magnitudë 'të lartë' në shkallën e intensitetit sizmik të Japonisë. Tërmeti u regjistrua fillimisht si 7.4, përpara se të rishikohej në 7.5. Epiqendra e tij ishte në brigjet e Sanrikut, në veri të ishullit kryesor të vendit, në një thellësi prej 10 km. Lëkundje të mëdha pasuese mund të ndodhin në ditët dhe javët në vijim, tha një zyrtar nga Agjencia Meteorologjike e Japonisë. Trenat e shpejtësisë së lartë u ndaluan dhe zyra e kryeministrit të Japonisë ngriti një ekip për menaxhimin e krizave. Stacioni bërthamor Onagaëa, në jug të zonës më të prekur, po kontrollohet për ndonjë ndikim. Deri më tani nuk janë raportuar probleme në vendet bërthamore. Kontrollet vazhdojnë edhe në centralin bërthamor Daini të Fukushimës, i cili gjithashtu nuk ka raportuar anomali. Fukushima është stacioni më i madh bërthamor në botë dhe u rihap në janar gati 15 vjet pas një shkrirjeje të madhe. Në dhjetor, një tërmet masiv me magnitudë 7.5 ballë goditi verilindjen e vendit, duke shkatërruar rrugë dhe duke plagosur të paktën 34 persona.