Qindra banorë të qytetit Oleshky, i cili ndodhet nën pushtimin rus në Ukrainë, janë evakuuar gjatë një armëpushimi të rrallë humanitar, të ndërmjetësuar nga Zonja e Parë e SHBA-së, Melania Trump. Operacioni u zhvillua pas një marrëveshjeje mes autoriteteve ruse dhe ukrainase, duke mundësuar largimin e sigurt të civilëve nga një qytet i shkatërruar rëndë nga lufta. Për evakuimin u organizua me 25 autobusë, me kapacitet për të transportuar deri në 750 persona, si dhe ambulanca për banorët me vështirësi në lëvizje. Qytetarët patën një afat prej katër orësh për t'u larguar nga qyteti. Sipas përfaqësuesve të të dyja palëve, operacioni përfundoi pa incidente dhe me një organizim të mirë. Banorët e evakuuar fillimisht do të kalojnë në territorin e pushtuar nga Rusia dhe më pas do të transportohen drejt qytetit rus të Anapës. Prej andej, ata do të udhëtojnë me një avion qeveritar rus drejt Gomelit në Bjellorusi dhe më pas do të kalojnë me makinë në territorin ukrainas, në rajonin e Chernihivit. Armëpushimi, i cili konsiderohet ndër më të gjatët dhe më të përhapurit që nga fillimi i pushtimit rus në vitin 2022, mundësoi edhe çminimin e rrugës që lidh qytetin me zonat përreth. Megjithatë, disa qindra banorë kanë vendosur të mos largohen, pavarësisht shkatërrimeve të mëdha dhe mungesës së gazit, energjisë elektrike dhe ujit të pijshëm. Autoritetet ruse dhe ukrainase kanë shprehur dëshirën që operacione të tilla humanitare të organizohen edhe në të ardhmen, në mënyrë që civilët të kenë mundësi të largohen të sigurt nga zonat e prekura nga luftimet.