Italia është përfshirë nga një valë protestash dhe mobilizimesh sociale, të zhvilluara në disa prej qyteteve kryesore të vendit. Krahas grevës së përgjithshme kombëtare 24-orëshe, të organizuar nga sindikata USB, në protesta janë përfshirë edhe punonjës të sektorit publik dhe privat, si dhe grupe studentësh nga shkollat e mesme dhe universitetet. Gjatë së premtes, 30 tetor, në qytete të ndryshme janë zhvilluar marshime dhe tubime proteste, të cilat në disa raste kanë degjeneruar në përplasje me forcat e policisë. Situata më e tensionuar është paraqitur në Romë, Napoli, Bolonjë dhe Torino. Në kryeqytetin italian, protestuesit janë përplasur me policinë gjatë përpjekjeve për të kaluar kordonin e sigurisë dhe për ta çuar protestën pranë Parlamentit. Si pasojë e incidenteve, tetë persona janë ndaluar. Ndërkohë, në Torino, policia ka ndërhyrë me forcë në qendër të qytetit. Në Xhenova, protestuesit kanë bllokuar hyrjen e portit, ndërsa në Milano dhe zona të tjera, autostrada Tangenziale Est ka qëndruar e mbyllur për disa orë, duke shkaktuar probleme në qarkullimin rrugor. Protestuesit kërkojnë masa konkrete për përballimin e rritjes së kostos së jetesës, rritjen e pagave në përputhje me inflacionin dhe kundërshtojnë shtimin e shpenzimeve shtetërore për armatimin dhe mbrojtjen. Në grevë është përfshirë edhe sektori i shëndetësisë, ku punonjësit kanë ndërprerë punën nga fillimi i turnit të parë të mëngjesit deri në përfundimin e turnit të fundit të mbrëmjes. Megjithatë, shërbimet minimale shëndetësore dhe ndërhyrjet urgjente në repartet e emergjencës janë garantuar. Tensionet ishin paralajmëruar që përpara zhvillimit të protestave, pas vendimit të ministrit të Transporteve, Matteo Salvini, për të kufizuar grevën dhe për ta shtyrë atë në një datë tjetër. Protesta ka rikthyer në vëmendje pakënaqësinë sociale në Itali, ku rritja e çmimeve, fuqia blerëse e pagave dhe politikat e shpenzimeve ushtarake janë kthyer në çështje kryesore të debatit publik.