Xi Jinping ka përjashtuar një numër rekord zyrtarësh, si pjesë e një fushate për të spastruar “rreziqet e fshehta” nga brenda Partisë Komuniste Kineze. Janë spastruar rreth 33 anëtarë, përfshirë 16 nga ushtria, ndërsa presidenti kinez forcon kontrollin e tij. Zhang Youxia, gjenerali me gradën më të lartë në Kinë, u shkarkua gjithashtu pas një hetimi disamujor për korrupsion. Ma Xingrui, ish-sekretari i partisë në Xinjiang, shkarkimi i të cilit u konfirmua, është larguar nga të gjitha funksionet për shkak të akuzave për korrupsion, përfshirë nepotizmin, ryshfetin dhe pagesat për marrëdhënie seksuale. Zyrtarë të partisë thanë se Komiteti Qendror me në krye Xi Jinping, ka “eliminuar rreziqe të fshehta serioze brenda partisë, shtetit dhe ushtrisë”. Sipas tyre partia e ka kryer këtë spastrim sepse “preferon të zemërojmë mijëra njerëz, në vend që të zhgënjejë 1,4 miliardë të tjerë”. Anëtarët e partisë komuniste kineze u mblodhën këtë javë për plenumin – një takim i zyrtarëve të lartë që zhvillohet shtatë herë gjatë një periudhe pesëvjeçare. Ky plenum, i pesti nga shtatë gjithsej, shënoi numrin më të madh të karrigeve bosh në historinë kineze. Vetëm 279 anëtarë ishin të pranishëm në Sallën e Madhe të Popullit në Pekin, një shifër më e ulët se 376 anëtarët e emëruar në komitet gjatë kongresit të fundit të partisë në vitin 2022. Kjo është hera e parë gjatë udhëheqjes së zotit Xi që numri i të pranishmëve bie nën 300. Që kur erdhi në pushtet në vitin 2012, Xi Jinping e ka bërë luftën kundër korrupsionit një shtyllë kryesore të udhëheqjes së tij, duke spastruar zyrtarë në të gjitha nivelet, përfshirë edhe ata që besohej se ishin të afërt me të dhe familjen e tij.