Rusia lëshoi një breshëri dronësh dhe raketash në kryeqytetin ukrainas Kiev të martën, duke vrarë gjashtë persona, duke plagosur 13 të tjerë dhe duke ndërprerë sistemet e energjisë elektrike dhe të ngrohjes, thanë zyrtarët. Presidenti Volodymyr Zelenski tha se forcat ruse lëshuan më shumë se 460 dronë dhe 22 raketa. Ky ishte sulmi i dytë i madh rus ndaj Kievit këtë muaj. "Objektivat kryesorë ishin sektori i energjisë dhe gjithçka që e mban jetën normale në lëvizje," tha Zelenski në një postim në aplikacionin Telegram. Njësitë e mbrojtjes ajrore ukrainase rrëzuan 22 raketa dhe 464 dronë, thanë forcat ajrore. Ndërsa Rusia goditi Kievin në disa valë sulmesh, bisedimet diplomatike se si t'i jepet fund luftës kanë marrë vrull. Zyrtarët ukrainas, evropianë dhe amerikanë kanë zhvilluar disa raunde bisedimesh ditët e fundit duke diskutuar propozimet e paqes pasi Uashingtoni paraqiti një plan që do të plotësonte shumë nga kërkesat e Rusisë. "Ajo që ka më shumë rëndësi tani është që të gjithë partnerët të ecin së bashku drejt diplomacisë, përmes përpjekjeve të përbashkëta. Presioni ndaj Rusisë duhet të japë rezultate", tha Zelenski, duke kërkuar furnizime të pandërprera me armë dhe mbrojtje ajrore për Kievin.