Ndërkohë që liderët botërorë po bëjnë vazhdimisht thirrje për t’u vaksinuar, presidenti i Filipineve, Rodrigo Duterte ka kërcënuar se do të burgosë të gjithë ata që nuk pranojnë të vaksinohen kundër koronavirusit. “Zgjedhja është e juaja, ose vaksinohuni, ose unë do t'ju fus në burg”, tha Duterte në një fjalim televiziv, pas raporteve për pjesëmarrje të ulët të njerëzve në disa qendra vaksinimi në kryeqytetin Manila. Komentet e tij bien në kundërshtim me ato të zyrtarëve shëndetësorë, të cilët i kanë inkurajuar qytetarët që të vaksinohen, pasi sipas tyre kjo është çështje vullneti. Deri më 20 qershor, autoritetet e Filipineve kanë vaksinuar plotësisht rreth 2.1 milionë njerëz dhe qeveria ka si synim vaksinimin e 70 milionë njerëzve këtë vit. Duterte, i cili është kritikuar për qasjen e tij të ashpër për frenimin e koronavirusit, po ashtu tha se i mbetet qëndrimit të tij të mëparshëm për mos hapjen e shkollave. Filipinet janë mes vendeve më të goditura nga koronavirusi në Azi, ku vendi ka shënuar mbi 1.3 milion raste të të infektuarve dhe mbi 23,000 viktima.