Gjykata e Posaçme refuzoi kërkesën e mjekëve dhe zyrtarëve të tjerë nën hetim për të shpallur moskompetencë dhe për të rikthyer në Prokurorinë e Tiranës dosjen ndaj tyre. Seanca maratonë zgjati rreth dy orë. Në sallë ishte mjeku Edmond Gashi dhe mjekja Alketa Pere. Përmes avokatëve, mjekët kërkuan që gjykata të shpallë moskompetencë për këtë dosje dhe ta përcjellë atë në Prokurorinë e Tiranës, aty ku nisën hetimet. Nëse moskompetenca nuk shpallet, avokatët kërkuan që ndaj klientëve të tyre të caktohej një masë sigurie më e butë. Gjykata rrëzoi të dyja kërkesat e avokatëve, duke lënë dosjen në kompetencë të SPAK-ut dhe në fuqi masat e sigurisë të vendosura nga Gjykata e Tiranës. Kjo gjykatë ka caktuar arrest shtëpie për mjekun Edmond Gashi dhe detyrim paraqitje për mjeken, Alketa Pere. Mjekët akuzohen për krijimin e një skeme të orientimit të pacientëve drejt klinikave private, si dhe për kontrabandë ilaçes.