Drejtoria e Përgjithshme e Tatimeve u bën thirrje bizneseve që të tregohen të kujdesshëm dhe të kërkojnë mjetet e identifikimit për personat që paraqiten pranë tyre për kontrolle si punonjës të tatimeve. Përmes një njoftimi në rrjetet sociale, drejtoria e Tatimeve nënkupton se rastet e mashtrimit ndaj bizneseve mund të shtohen gjatë periudhës së verës, kur shënohet piku i sezonit turistik dhe i aktivitetit për shumë sipërmarrës. Punonjësit e Administratës Tatimore, thuhet në njoftim ushtrojnë detyrat e tyre funksionale, në zbatim të legjislacionit tatimor në fuqi, duke u identifikuar në subjekte me elementet dalluese si kartën identifikuese të punonjësit që përmban emër, mbiemër, foto, pozicioni i punës dhe drejtorinë, urdhrin e firmosur nga titullari i drejtorisë dhe uniformat dalluese me mbishkrimin administrata tatimore. Tatimet u kërkojnë bizneseve që të mos ngurrojnë dhe të denoncojnë çdo përballje me persona të dyshimtë me elementët e mësipërm. Njoftimi i tatimeve nuk referon asnjë rast të bizneseve që kanë denoncuar mashtrim, por burime të Top Neës pohojnë se janë rritur rastet kur persona të ndryshëm paraqiten te biznese të caktuara si inspektorë tatimesh në kërkim të ryshfetit.