Gjykata Kushtetuese ka rrëzuar kërkesën e parë për shfuqizimin e zgjedhjeve lokale të 30 qershorit 2019. Ka qenë Partia Konservatore e drejtuar nga Kujtim Gjuzi, ajo e cila megjithëse mori pjesë në zgjedhjet e 30 qershorit i ka cilësuar këto zgjedhje të papajtueshme me Kushtetutën e Republikës së Shqipërisë. Trupa gjykuese ka vendosur të mos e kalojë çështjen për shqyrtim, duke argumentuar se ky subjekt politik nuk e ka ankimuar rezultatin e zgjedhjeve pranë Komisionit Qendror të Zgjedhjeve si dhe nuk ka paraqitur prova të mjaftueshme për të mbështetur interesin e saj në këtë kërkesë. Mbledhja e Gjyqtarëve vlerësoi se partia e Kujtim Gjuzit nuk legjitimohet, pasi nuk provon interesin e saj të drejtpërdrejtë në kuptim të normave dhe standardeve kushtetuese. Kujtojmë se zgjedhjet lokale të 2019 u zhvilluan në atmosferën e një ngërçi politik pasi në 31 nga 61 bashki gjithsej , kandidatët për kryetar bashkie garuan pa kundërshtarë. Në muajin shkurt të 2019 Partia Demokratike dhe Lëvizja Socialiste për Integrim, u tërhoq nga kuvendi dhe vendosi të mosmarrë pjesë në zgjedhje deri në dorëheqjen e kryeministrit Rama dhe formimin e një qeverie teknike. Në 10 qershor Presidenti Meta nxorri dekretin përmes të cilit anulonte zgjedhjet. Ky dekret është sot një ndër argumentat e grupit parlamentar të Partisë Socialiste për të shkarkuar presidentin Meta nga detyra. Ndërkohë tërheqja nga kuvendi dhe moskandidimi në zgjedhjet lokale të 2019 është pranua publikisht nga dy partitë opozitare si një gabim që rezultoi në disfatën e 25 Prillit.