Lidhja Demokratike e Kosovës akuzoi Albin Kurtin për ciklin e ri të krizës në të cilin u fut vendi pas dështimit të zgjedhjes së Presidentit të ri të vendit. Kreu i LDK, Lumir Abdixhiku deklaroi pas dështimit të procesit në Kuvend se Vetëvendosje u përpoq të nënshtrojë opozitën duke e ftuar për të propozuar kandidatë, por se ftesa ishte e pasinqertë. Sipas tij, përmes ftesës, Albin Kurti synonte vetëm plotësimin e kuorumit prej 80 deputetësh në sallë për të votuar më pas me 61 vota kandidatin për president të propozuar prej vetë atij. Abdixhiku ftoi qytetarët që të mobilizohen për të rikthyer normalitetin në Kosovë përmes zgjedhjeve të reja për të larguar dramat dhe propagandën nga qeverisja e vendit.