Kontrolli i territorit për parandalimin e veprimtarisë kriminle për fushën e kultivimit të bimëve narkotike vijon të jetë masiv, ku për pasojë janë goditur 3 raste të tilla, në zonat e Selenicës dhe Dukatit në Vlorë. Bëhet me dije se operacioni policor I koduar ‘Dukati’ është finalizuar me sukses, ku për pasojë në pranga janë vënë shtetasit Tonin Azizaj, Simon Imamaj dhe Jurgen Kapaj, ndërkohë që janë shpallur në kërkim Shkëlqim Zykaj dhe Shkëlzen Zykaj. Sipas burimeve policore, personat e arrestuar dyshohen se në bashkëpunim me njeri-tjetrin, në vendin e quajtur “Llovisë”, në fshatin Dukat, në një sipërfaqe të pyllëzuar, kanë kultivuar në kubikë fidanë cannabis sativa. Gjatë kontrollit të ushtruar në kasollet ku këta shtetas qëndronin u gjet dhe u sekuestrua një sasi prej 11 kg lëndë narkotike e dyshuar si kanabis në formë boçeje. Po ashtu gjatë kontrollit në banesën e Shkëlqim dhe Shkëlzen Zykaj policia sekuestroi një sasi prej 1.74 kg lëndë narkotike e dyshuar si kanabis, një sasi municioni luftarak dhe 1 armë e ftohtë. Materialet hetimore i kaluan Prokurorisë së Rrethit Gjyqësor Vlorë, për veprime të mëtejshme.