Polcia Rrugore ka vijuar kontrollet intensive në të gjitha rrugët urbane dhe interurbane për të shmangur aksidentet e mundshme rrugore. Gjatë 24 orëve të fundit, policia rrugore ka vënë në pranga 2 persona, për arsye se këta të dy i ofruan ryshfet punonjësve të policisë për të shmangur ndëshkimin për shkeljen e kryer. Falë telefonatave të qytetarëve, policia rrugore e Durrësit ka parandaluar një ngjarje të rrezikshme të mundshme rrugore. Në rrugën Maminas – Gjiri i Lalzit, një shtetas po kryente manovra të rrezikshme në rrugë ndërkohë që drejtonte mjetin në gjendje të dehur dhe për pasojë humbi kontrollin e mjetit duke dalë nga rruga, për t’iu shmangur shërbimeve të Policisë. Policia Rrugore e Sarandës, nisur nga telefonatat e banorëve të një lagjeje se një drejtues mjeti sillte shqetësim duke xhiruar gomat gjatë orëve të vona të natës, ka ndaluar drejtuesin e mjetit, dhe e kanë ndëshkuar me masë administrative 20.000 lekë të rinj dhe i pezulluan lejen e drejtimit për 1 muaj. Po në 24 orët e fundit janë arrestuar në flagrancë 11 drejtues mjetesh, nga të cilët 6 për drejtim mjeti në gjendje të dehur dhe 5 për drejtim mjeti pa leje drejtimi. Gjithsej janë perzulluar 30 leje drejtimi, nga të cilat 17 për drejtim mjeti me shpejtësi tej normave të lejuara dhe 13 për drejtim mjeti nën efektin e alkoolit apo në gjendje të dehur. Falë kontrolleve intensive në të gjithë vendin janë ndëshkuar me masë administrative 1mijë e 678 drejtues mjetesh, për shkelje të Kodit Rrugor që përbëjnë rrezik potencial për përfshirje në ngjarje rrugore.