Presidentja në detyrë e Kosovës, Albulena Haxhiu, do të zhvillojë këtë të enjte një takim konsultativ me partitë politike lidhur me caktimin e datës së zgjedhjeve të reja. Pjesëmarrjen e kanë konfirmuar disa prej përfaqësuesve kryesorë, mes tyre kreu i Partisë Demokratike të Kosovës, Bedri Hamza, Jehona Lushaku-Sadriu nga Lidhja Demokratike e Kosovës, si dhe Ardian Gjini nga Aleanca për Ardhmërinë e Kosovës. Ndërkohë, përfaqësuesit e komuniteteve joshumicë kanë shprehur gatishmërinë për të qenë pjesë e këtij takimi, duke paraqitur edhe preferencat e tyre për datën e mbajtjes së zgjedhjeve. Kosova do të shkojë në zgjedhjet e katërta në harkun kohor të 15 muajve. Partitë politike në Kuvend dështuan që të tejkalojnë ndasitë dhe të zgjedhin një emër për Presidentin e ri të vendit. Afati kushtetues i mesnatës mes të martës dhe të mërkurës u përmbyll pa sukses. Pas këtij zhvillimi, sipas vendimeve të Gjykatës Kushtetuese në Kosovë ka nisur numërimi i afatit për mbajtjen e zgjedhjeve të parakohshme.