Mungesa e kazanëve të mbeturinave në fshatin Plug të Lushnjes për më shumë se një javë ka detyruar banorët që mbeturinat t'i hedhin në tokë . Shkak për mungesën e kontenierëve është bërë firma që prej 15 vitesh pastronte fshatin, por me humbjen e tenderit ajo ka tërhequr edhe kontenierët. Bashkia Lushnje nga ana e saj është munduar të pastrojë plehrat me aq mundësi sa ka, por që nuk ia del dot. Në këto kushte banorët u ankuan në Fiks Fare pasi është e pamundur të jetohet me plehrat nëpër këmbë. Fiksi iu drejtua Bashkisë Lushnje për të kuptuar diçka nga situata e krijuar. Drejtori i Shërbimeve Publike në bashki, z.Ergest Karkulli shprehet për Fiksin se situata e krijuar në fshatin Plug është si rrjedhojë e humbjes së tenderit nga firma që e pastronte territorin prej 15 vjetësh. Me ikjen e saj ajo tërhoqi edhe kontenierët e plehrave nga vendet përkatëse. Bashkia vetë ka rreth 360 kontenier dhe po mundohet ta ketë nën kontroll situatën shprehet drejtori. Ai shpjegon se nga ana e Bashkisë Lushnje është berë tenderi për pastrimin e këtyre territoreve dhe është shpallur firma fituese, por firmat e tjera pjesmarrëse në tender e kanë ankimuar e si pasojë pritet mbyllja e procedurave. Pyetjes se kur mund të marr fund kjo situatë z. Karkulli iu përgjigj se në fund të muajit problematika do jetë zgjidhur.