Dy efektivë të policisë me detyra në pikën kufitare të Hanit të Hotit u lanë në masën e sigurisë arrest shtëpie nga gjykata e Posaçme me akuzën e shpërdorimit të detyrës. Efektivët, 55 dhe 58 vjeç dyshohet se në bashkëpunim me tre persona të tjerë nga Malësia e Madhe lehtësuan një skemë të trafikimit të emigrantëve në drejtim të SHBA dhe Kanadasë. Hetimet për rastin nisën pas sinjalizimeve nga Ambasada e Shteteve të Bashkuara të Amerikës. Pas këtyre sinjalizimeve, SPAK zbuloi një skemë të mirëfilltë trafiku emigrantësh të paligjshëm përmes dokumentacioneve të falsifikuara që organizohej nga shtetasi Luc Melaj. Ky i fundit, në bashkëpunim me shtetasit Emanuel Melaj dhe Gezim Canaj kishin rolet e rekrutimit të personave që kërkonin emigrimin drejt SHBA përmes dokumenteve të falsifikuara. Nga hetimet ka rezultuar se këta shtetas, në bashkëpunim me njëri-tjetrin, nëpërmjet dokumenteve false dhe mosregjistrimit në sistemin TIMS, kanë kaluar në PKK Hani i Hotit, shtetas shqiptarë që kishin destinacione Kanadanë dhe Amerikën. Gjatë kontrolleve në banesët e tyre, policia ka gjetur vlera monetare në total rreth 20 mijë euro, janë sekuestruar 17 celularë, 3 automjete, blloqe shënimesh, regjistra hyrje-daljesh, bileta udhëtimi dhe mandate pagesash nëpër banka.