Kryeministrja japoneze Sanae Takaichi këtë javë la të kuptohej një ndryshim të mundshëm në parimet jo-bërthamore të vendit, që janë në fuqi prej dekadash, duke ngritur spekulime se ajo mund të kërkojë të rishikojë ndalimin e hyrjes së armëve të tilla në territorin e saj. Takaichi tha të hënën në parlament se nuk mund të thoshte nëse këto tre parime, për të mos poseduar, prodhuar ose futur armë bërthamore në territorin e vendit, do të ruheshin, në një rishikim të ardhshëm të strategjisë së sigurisë së Japonisë. "Nuk mund të bëj një deklaratë përfundimtare ose të them se do të shkruhet në mënyrë të tillë", tha ajo, duke iu përgjigjur pyetjes së një ligjvënësi të opozitës. Ajo shtoi se, për momentin, qeveria ende i përmbahet parimeve ekzistuese si një udhëzues politik. Komentet e saj të kaluara dhe refuzimi për t'u angazhuar ndaj premtimit të mbajtur nga administratat japoneze që nga viti 1967 kanë ngritur mundësinë që ajo të kërkojë të rishikojë parimin e tretë, i cili ndalon hyrjen e armëve bërthamore në territorin e Japonisë. Në një libër të vitit 2024, përpara se të merrte detyrën, ajo e përshkroi këtë parim si jo realist, pasi Shtetet e Bashkuara mund të kenë nevojë të sjellin armë bërthamore në Japoni për të penguar rivalët. Japonia, ashtu si Koreja fqinje e Jugut, është e mbrojtur nën të ashtuquajturën ombrellë bërthamore të Uashingtonit. Në Japoni, ekziston një gatishmëri politike dhe publike në rritje për të hequr dorë nga ky premtim, edhe pse tema mbetet tabu në të vetmin komb që ka pësuar një sulm me bombë bërthamore. Grupet anti-bërthamore në Japoni kundërshtojnë ashpër armët bërthamore, duke thënë se Tokio është moralisht e detyruar t’i kundërshtojë ato, përfshirë praninë në tokën japoneze, për shkak të tmerreve të bombardimeve të Hiroshimës dhe Nagasakit, në fund të Luftës së Dytë Botërore. Por, ndërsa kujtimet zbehen dhe kërcënimet rajonale shtohen, sondazhet e opinionit publik tregojnë një hapje gjithnjë e në rritje për të diskutuar opsionet alternative bërthamore.