Virgin Galactic thotë se ka rihapur shitjen e biletave për në hapësirë, për të parën herë në disa vite, duke i dhënë të gjithë atyre që mund ta përballojnë, shansin për të rezervuar një vend në raketën e kompanisë, për 450 mijë dollarë, një rritje e ndjeshme kjo e cmimit me të cilin janë shitur biletat më parë. Lajmi vjen pasi themeluesi i Virgin Galactic, Richard Branson, e shijoi vetë i pari udhëtimin në hapësirë, pas më shumë se një dekade premtime se do të ishte ndër të parët që do të testonte teknologjinë dhe kompania tani thotë se ëhstë e gatshme të nisë operacionet komerciale në 2022-shin. Virgin Galactic thotë se do të ketë tre oferta- rezervimet për një vend të vetëm që fillojnë nga 450 mijë dollarë, rezervimet e shumëfishta për familje dhe miq dhe një opsion për të blerë të gjashtë vendet në avion për një fluturim të caktuar. Ndërsa vendet për kërkime mbi mikrogravitetin dhe trajnime profesionale për astronaut do të kenë një cmim prej 600 mijë dollarësh.