28 ditë rrugë për tu larguar nga afganistani, një grua dhe pesë fëmijët e saj, qëndrojnë në një hije afër një stacioni autobuzësh në Tatvan, një qytezë në brigjet e liqenit Van në Turqinë lindore. Ajo po pret për një trafikant, që është paguar më herët, për ta cuar familjen në stamboll. Të lodhur dhe të pistë, fëmijët më të vegjël luajnë në pluhur dhe qeshin. Trafikanti ka dy ditë që nuk shfaqet. “Bashkëshorti im vdiq në përleshjet me talebanët në Ghazni”, tregon ajo. “Ka atje luftime të ashpra edhe tani. Ne kaluam nëpër male në Iran, dhe u ndaluam nga ushtarët turq në kufi, por më në fund na lanë të kalonim. Kemi ecur me ditë të tëra. Fëmijët e mi po sëmuren. Është një situatë shumë e vështirë”.Kaosi ka mbërthyer menjëherë afganistanin pas tërheqjes së trupave amerikane dhe atyre të NATO-s, pas 20 vitesh luftime kundër lëvizjes xhihadiste; talebanët tani pretendojnë se kanë nën kontroll 85 për qind të vendit duke ndezur frikën për një luftë të re civile. Ndërsa është ende shumë herët për të thënë se avancimi i militantëve do të ndezë një eksod të refugjatëve afganë jashtë kufijve të vendit, agjencia e refugjatëve e OKB, thotë se që nga janari rreth 270 mijë vetë kanë lënë shtëpitë dhe janë zhvendosur brenda për brenda vendit. Turqia ndërkohë është pritësja më e madhe e refugjatëve në botë dhe mban aktualisht rreth 4 milionë të tillë. Pjesa më e madhe janë sirianë, 3.7 milionë, por afganët përbëjnë grupin e dytë më të madh.