Ish krybashkiaku i Lushnjës, Fatos Tushe do të dalë përpara trupës gjykuese, të kryesuar nga Nertina Kosova në datën 28 korrik, pas apelimit që i bëri vendimit të shkallës së parë Anti-korrupsion. Fatos Tushe nëpërmjet avokatit të tij mbrojtës i është drejtuar Apelit, duke apeluar vendimin e marrë nga shkalla e parë dhe duke kërkuar një amsë më të butë sigurie. Gjithashtu me kërkesë për masë më të bute sigurie Apelit i janë drejtuar edhe 10 vartësit e Tushes, të cilët u vunë në pranga rreth një javë më parë, pasi SPAK ka ngritur ndaj tyre tre akuza, atë të “Falsifikimit të dokumenteve”, shpërdorimit të detyrës” dhe “abuzimit me tendera publike”. Fatos Tushe pretendon se nuk ka prova të mjaftueshme që implikojnë atë në abuzimin me tenderin. Lidhur me pretendimet për mungesë provash dhe ndryshim mase sigurie, Fatos Tushe do të dalë përpara trupës gjykuese në 28 korrik. Gjykata e posaçme e shkallës së parë kundër korrupsionit dhe krimit të organizuar me kërkesë të SPAK vendosi masën e sigurisë ‘arrest me burg’ për kryebashkiakun Fatos Tushe. Ky i fundit u kap nga SPAK vetëm pak ditë më parë, pas abuzimeve masive financiare që kishte kryer me tenderin për rehabilitimin e kanalit vaditës. Dëmi financiar i shkaktuar nga favorizimiet dhe abuzimet me procesin e tenderimit kapi shifrën e 240 milionë lëkësh. Në skemën korruptive, Fatos Tushe kishte përfshirë edhe zyrtarë të tjerë të lartë, me të cilët ndanin fitime marramendëse nga abuzimi me tenderat publikë. Pak ditë më parë policia hyri në ambientet e bashkisë duke ekzekutuar 11 urdhër arrestet e SPAK, duke vënë në praga kryebashkiakun Tushe; Flamur Peqinin; Ibrahim Lamin; Bujar Muratin; Gazmend Çelën; Bektash Nexhën dhe Blerta Turkun. Gjithashtu u ndaluan edhe shtetasit, Margarita Gjermeni; Andri Musho; Ani Simoni, dhe Xhemal Haskon, ndaj të cilëve SPAK kërkoi, masën e sigurisë “arrest shtepie”.