Skema e trafikut të kokainës përmes kontenierëve me banane vijon të përdoret nga trafikantët. Një tjetër sasi e konsiderueshme prej gati 150 kg kokainë është sekuestruar mesditën e së martës e fshehur në një kontenier me banana që vinte nga Ekuadori. Operacioni u ndërmor nga Policia Kufitare e Portit të Durrësit, Policia Kriminale dhe autoritetet doganore të Portit, të cilët pas kontrollit të kontenierit konstatuan ngarkesën e dyshimtë të fshehur në 14 pako e dyshuar si kokainë. Kontrolli i ngarkesës me banane u ndërmor në bazë të dyshimeve të krijuara nga Task Forcë dhe informacioneve që dispononte Policia Kriminale lidhur me kontenierin me banane që vinte për llogari të një kompanie private në Shqipëri, emri i së cilës nuk bëhet i ditur. Pas konstatimit të pakove të dyshuara si kokainë policia ka shoqëruar dy persona që kanë lidhje me ngarkesën në fjalë dhe janë të përfshirë në aktivitetin e trafikut të narkotikëve. Ata po merren në pyetje në Polisinë e Durrësit.