Në zgjedhjet parlamentare të së djelës, të konsideruara të një rëndësie kyce për ëndrrën e anëtarësimit të vendit në BE, opozita në Shqipëri pretendoi fitoren por partia në pushtet ia bëri të qartë se ishte shumë shpejt për të dalë në përfundime. Dhe rezultatet ndryshuan. Komisioni zgjedhor, thotë Euractiv, theksoi se do të duhen dy ditë për të mësuar rezultatin e qartë të një votimi që u shënjua nga javë të tëra përplasjesh verbale mes kandidatëve, dhe të shtënave me armë zjarri që i kushtuan jetën një personi. Por pavarësisht fushatës së nxehtë, vëzhguesit ndërkombëtarë përfshirë dhe ambasadorë nga vendet europiane dhe Shtetet e Bashkuara raportuan se vetë dita e votimit kaloi pa probleme serioze. Mbështetur në të dhënat e deritanishme, shihet se diferenca mes partive kundërshtare është mjaft e ngushtë, ndërsa rezulton se PS ka marrë më shumë vota se PD, e LSI ka humbur elektorat, por theksohet se është ende herët për të bërë parashikime. Për Thomas Brey, doktor i shkencave politike, nëse këto zgjedhje zhvilloheshin pak a shumë sic duhet, dhe vëzhguesit e OSBE nuk shihnin manipulime të mëdha, duke lënë mënjanë ato defektet e vogla, ky do të ishte një hap në drejtimin e duhur drejt një jete politike më normale në Shqipëri. Pavarësisht rezultatit nuk besoj në ndërrimin e kulturës politike menjëherë, thotë ai. Nuk besoj se problemet do të zgjidhen pavarësisht kush fiton, por një ecuri e rregullt e zgjedhjeve do të jetë për vendin një hap përpara”!