Studiuesit e Universitetit të Kalifornisë kanë zbuluar se gjedhët prodhojnë më pak metan që dëmton ambientin, nëse ushqehen me disa lloje të caktuara algash. Dhe nuk është cudi që ushqimi i tyre i zakonshëm, shumë shpejt të ndryshojë. Shkencëtarët duket se e kanë disa kohë që kanë eksperimentuar duke përzier sasi të vogla të një alge të kuqe në ushqimin e qeve, dhe rezultati ka qenë befasues! Ekspertët vunë re se algat e kishin ulur me 80 përqind sasinë e metanit që nxjerrin këto kafshë ripërtypëse. Është pohuar me kohë se gjedhët prodhojnë sasi të mëdha gazi metan që demton klimën. Metani është 25 herë më i dëmshëm për ambjentin sesa dioksidi i karbonit, dhe gjedhët që rriten për prodhimin e qumështit dhe të mishit prodhojnë mbi 9 përqind të gjithë emisioneve të gazrave të dëmshme për klimën, që shkaktohen nga njeriu. Me një miliardë lopë që numërohën në rruzullin tokësor, pasojat e konsumit të mishit dhe qumështit nga njeriu janë të mëdha për klimën. Pjesa që zenë vendet e industrializuara në këto pasoja, është shumë më e madhe se e vendeve të tjera. Konsumi për kokë i mishit në vendet e industrializuara është tre herë më i larte se sa në vendet në zhvillim. Në krye të listës qëndrojnë Australia, SHBA dhe Spanja me konsumin e mbi njëqind kilogrami mish në vit për frymë.