Gjykata Themelore në Prishtinë dënoi me gjashtë vite burg Jelena Gjukanoviçin, e akuzuar për veprën penale “spiunazh”. Sipas Prokurorisë Speciale, e pandehura në cilësinë e zyrtares së misionit të OSBE-së në Kosovë, ka ndihmuar shërbimet sekrete serbe me dërgimin e dokumenteve me përmbajtje sensitive për çështje politike dhe të sigurisë në vend. Në shpalljen e dënimit, gjykata saktësoi se do t’i llogaritet edhe masa e paraburgimit Sipas Prokurorisë Speciale, në ditën kur ka ndodhur sulmi terrorist në zyrat e Komisionit Komunal të Zgjedhjeve në Mitrovicë të Veriut më 2022, e pandehura pati komunikim me të dënuarin në shkallë të parë, për të njëjtën vepër penale, Aleksandër Vlajiç. Pas vendimit, prokurori special Bekim Kodraliu tha se do të ndiqen e hetohen të gjithë ata të cilët cenojnë sigurinë kombëtare dhe jetën e qytetarëve. Nga ana tjetër, avokati i të pandehurës Gjukanoviç, Predrag Milkoviç, tha se do të apelojnë vendimin e Gjykatës Themelore. Vendimin e shkallës së parë e përshëndeti ministri i Punëve të Brendshme, Xhelal Sveçla. Ai tha se institucionet e sigurisë do të vazhdojnë pa kompromis luftën kundër këtyre veprimtarive. Jelena Gjukanoviç u arrestua më 28 shkurt të vitit 2025.