“Shtetet e Bashkuara presin nga kandidatët dhe udhëheqësit (e Shqipërisë) që të pranojnë vendimin e votuesve kur të përfundojë numërimi i votave,” u shpreh për VOA një zëdhënës i Departamentit amerikan të Shtetit. Duke përgëzuar qytetarët e Shqipërisë për pjesëmarrjen aktive në zgjedhjet e së djelës, ai përcolli shpresën për “një certifikim të shpejtë, efiçent dhe të plotë të rezultateve nga zyrtarët e zgjedhjeve”. “Ne mbështesim misionin vëzhgues të OSBE/ODIHR-it në Shqipëri. Shtetet e Bashkuara mirëpresin bashkëpunimin me qeverinë e dale nga zgjedhjet,” shton më tej zëdhënësi i Departamentit të Shtetit, duke nënvizuar se Shtetet e Bashkuara do të vazhdojnë të mbështesin Shqipërinë në rrugën e saj për të forcuar demokracinë, përfshirë shtetin ligjor, përgjegjshmërinë në qeverisje dhe reformat në drejtësi. “Siç e ka bërë të qartë ambasadorja (Yuri Kim), Shtetet e Bashkuara mbështesin proceset demokratike dhe jo ndonjë kandidat apo parti specifike,” deklaroi zëdhënësi. Teksa procesi i numërimit vazhdon, rezultatet paraprake i japin epërsi partisë socialiste. Nëse kryeministri edi rama arrin të sigurojë një mandate të tretë në krye të ekzekutivit, do të shënonte një rekord të parritur më parë që nga vendosja e pluralizimit politik.